చంద్రబాబుకు బిగ్ షాక్.. మున్సిపల్ ఎన్నికలకు బ్రేక్

అధికారం అండతో పురపాలక ఎన్నికలను ఏకపక్షం చేసుకోవాలనుకున్న కూటమి ప్రభుత్వ వ్యూహానికి గట్టి బ్రేక్ పడింది. రాష్ట్రంలోని 13 మున్సిపల్ కార్పొరేషన్లు, 87 మున్సిపాలిటీలు, నగర పంచాయతీలు.. మొత్తం 100 పట్టణ స్థానిక సంస్థల్లో తదుపరి ఎన్నికల ప్రక్రియను తక్షణమే నిలిపివేస్తూ రాష్ట్ర ఎన్నికల కమిషన్ (ఎస్‌ఈసీ) బుధవారం రాత్రి సంచలన ఉత్తర్వులు జారీ చేసింది.

రాష్ట్ర ఎన్నికల కమిషనర్ అనిల్ చంద్ర పునేఠా పేరిట ఈ ఉత్తర్వులు (నం.738/SEC-F1/2026) వెలువడ్డాయి. నామినేషన్లు, పరిశీలన పూర్తై.. అభ్యర్థుల తుది జాబితా విడుదల కావాల్సిన తరుణంలో రాష్ట్రమంతటా ఎన్నికల ప్రక్రియ ఒక్కసారిగా ఆగిపోయింది.

ఫిర్యాదులు వచ్చిన కొన్ని పురపాలికలకే పరిమితం కాకుండా, ఎస్‌ఈసీ మొత్తం 100 స్థానిక సంస్థల్లోనూ ప్రక్రియను నిలిపేయడం గమనార్హం. నామినేషన్ల దశలో రాష్ట్రంలో నెలకొన్న పరిస్థితుల తీవ్రతకు ఇదే అద్దం పడుతోంది. ఈ నెల 28న పోలింగ్, 30న ఓట్ల లెక్కింపు జరగాల్సి ఉండగా.. ఇప్పుడు మొత్తం షెడ్యూల్‌పైనే నీలినీడలు కమ్ముకున్నాయి.

మూడు రోజులు.. అడుగడుగునా అడ్డంకులు

ఈ పరిణామానికి బీజం నామినేషన్ల దశలోనే పడింది. ఈ నెల 16 నుంచి 18 వరకు మూడు రోజులపాటు నామినేషన్ల స్వీకరణ జరిగింది. ఆ మూడు రోజులూ రాష్ట్రంలో పలుచోట్ల ప్రతిపక్ష అభ్యర్థులు నామినేషన్ కేంద్రాలకు చేరుకోవడమే గగనమైంది.

అభ్యర్థులను బెదిరించడం, దాడులు చేయడం, చేతుల్లోంచి నామినేషన్ పత్రాలు లాక్కోవడం వంటి ఘటనలు జరిగాయని వైఎస్సార్‌సీపీ ఆరోపించింది. కడపలో ఓ అభ్యర్థి నామినేషన్ పత్రాలను లాక్కుని చించిపడేశారు. తిరుపతిలో తొమ్మిది మంది అభ్యర్థులను రిటర్నింగ్ అధికారుల కార్యాలయాల గుమ్మం కూడా తొక్కనివ్వలేదు. తమ అభ్యర్థుల్లో దాదాపు 63 శాతం మంది నామినేషన్లే వేయలేకపోయారని పార్టీ వెల్లడించింది.

పోలీసులు, అధికారులకు ఫిర్యాదులు చేసినా ఫలితం లేకపోవడంతో.. నామినేషన్ల గడువు పొడిగించాలని, అభ్యర్థులకు రక్షణ కల్పించాలని కోరుతూ వైఎస్సార్‌సీపీ హైకోర్టును ఆశ్రయించింది. గడువు ముగిశాక మళ్లీ నామినేషన్లు స్వీకరిస్తే ఎన్నికల ప్రక్రియలో జోక్యం చేసుకున్నట్టవుతుందంటూ హైకోర్టు ఆ అభ్యర్థనను తోసిపుచ్చింది. దీంతో పార్టీ ఈ నెల 19న సుప్రీంకోర్టు తలుపుతట్టింది.

ఎన్ని కేసులు పెట్టారు?: సుప్రీం ప్రశ్న

జస్టిస్ జోయ్‌మాల్య బాగ్చీ, జస్టిస్ వి.మోహనలతో కూడిన సుప్రీంకోర్టు ప్రత్యేక ధర్మాసనం బుధవారం ఈ పిటిషన్‌ను విచారించింది. వైఎస్సార్‌సీపీ సమర్పించిన ఆధారాలను పరిశీలించింది. ఈ ఘటనలపై ఎన్ని పోలీసు కేసులు నమోదు చేశారని ప్రశ్నించింది.

అభ్యర్థులను నామినేషన్లు వేయకుండా అడ్డుకున్నారనడానికి ప్రాథమికంగా బలమైన కేసు ఉందని ధర్మాసనం అభిప్రాయపడింది. నామినేషన్ వేసే హక్కు కూడా స్వేచ్ఛాయుత, నిష్పక్షపాత ఎన్నికల్లో అంతర్భాగమేనని తేల్చిచెప్పింది. స్వేచ్ఛగా ఎన్నికలు నిర్వహించేందుకు ఎన్నికల కమిషన్ చేతులు కట్టేసి లేవని ఎస్‌ఈసీకి గుర్తుచేసింది.

ఆరోపణలన్నీ ప్రతిపక్షం అల్లుతున్న మీడియా కథనాలేనని ప్రభుత్వం తరఫు న్యాయవాదులు వాదించారు. ఎన్నికల నిర్వహణ తమ రాజ్యాంగ పరిధిలోని అంశమని ఎస్‌ఈసీ వాదించింది. ఈ వాదనలు ధర్మాసనాన్ని ఒప్పించలేకపోయాయి.

సుప్రీం ఆదేశాలు ఇవీ..

అభ్యర్థుల తుది జాబితాను ఈ నెల 25 వరకు ప్రకటించరాదు. శాంతిభద్రతల సమస్యతో నామినేషన్లు వేయలేకపోయిన అభ్యర్థుల ఫిర్యాదులు, వీడియోలు సహా ఎలక్ట్రానిక్ ఆధారాలను ఎస్‌ఈసీ పరిశీలించాలి. ఎక్కడెక్కడ నామినేషన్ల గడువు పొడిగించాలో గురువారమే తప్పనిసరిగా నిర్ణయం తీసుకోవాలి.

గడువు పొడిగిస్తే ఎన్నికల నోటిఫికేషన్ సవరించి, కనీసం 48 గంటల సమయం ఇవ్వాలి. నామినేషన్ కేంద్రాల వద్ద పటిష్ట పోలీసు బందోబస్తు, సీసీ కెమెరాలు ఏర్పాటు చేసి అభ్యర్థులకు రక్షణ కల్పించాలని డీజీపీని ఆదేశించింది. ఎస్‌ఈసీ, రాష్ట్ర ప్రభుత్వం ఈ నెల 27లోగా కంప్లయన్స్ అఫిడవిట్లు దాఖలు చేయాలని స్పష్టం చేసింది.

ఈ ఆదేశాలు వెలువడిన కొన్ని గంటల్లోనే ఎస్‌ఈసీ మొత్తం 100 పురపాలికల్లో ఎన్నికల ప్రక్రియను నిలిపివేసింది.

ఏకగ్రీవాల బండారం బయటపడేనా?

ప్రత్యర్థులను నామినేషన్లే వేయనివ్వకుండా సాధించిన ఏకగ్రీవాలకు విలువేంటన్న ప్రశ్న ఇప్పుడు తెరపైకి వచ్చింది. ప్రభావిత వార్డుల్లో ఏకగ్రీవ ప్రకటనలను నిలిపివేయాలని వైఎస్సార్‌సీపీ సుప్రీంకోర్టును కోరింది.

ఎస్‌ఈసీ గడువు పొడిగిస్తే, అధికార కూటమి ఖాతాలో పడ్డాయనుకున్న అనేక స్థానాల్లో మళ్లీ పోటీ అనివార్యం కానుంది. పోటీ లేకుండానే పురపాలికలను కైవసం చేసుకోవాలనుకున్న ఎత్తుగడలకు ఇది గండికొట్టే పరిణామమని రాజకీయ విశ్లేషకులు అభిప్రాయపడుతున్నారు.

శాంతిభద్రతలు ప్రశ్నార్థకం

ఎన్నికల ప్రక్రియ మొదలయ్యాక కోర్టులు సాధారణంగా జోక్యం చేసుకోవు. అలాంటిది ఏకంగా సుప్రీంకోర్టు ప్రత్యేక ధర్మాసనం రంగంలోకి దిగి, నిర్దిష్ట గడువుతో ఎన్నికల సంఘానికి ఆదేశాలివ్వడం, అభ్యర్థుల రక్షణ బాధ్యతను నేరుగా డీజీపీకి అప్పగించడం అత్యంత అరుదైన పరిణామం.

నామినేషన్ వేసేందుకు కూడా అభ్యర్థులకు రక్షణ కల్పించాలని సర్వోన్నత న్యాయస్థానం ఆదేశించాల్సి రావడం.. కూటమి పాలనలో రాష్ట్రంలో శాంతిభద్రతలు ఏ స్థాయికి దిగజారాయో చెప్పకనే చెబుతోందని ప్రతిపక్షం విమర్శిస్తోంది.

నేడు ఎస్‌ఈసీ కీలక నిర్ణయం

కలెక్టర్లు, జిల్లా ఎన్నికల అధికారులు, పోలీసు కమిషనర్లు, ఎస్పీల నుంచి నివేదికలు తెప్పించుకుని గురువారం మరో ఉత్తర్వు ఇవ్వనున్నట్టు ఎస్‌ఈసీ వెల్లడించింది. ఏయే పురపాలికల్లో నామినేషన్ల గడువు పొడిగిస్తారు, ఎన్నికల షెడ్యూల్ ఎలా మారుతుందన్నది ఆ నిర్ణయంతో తేలనుంది. ఈ కేసు ఈ నెల 27న మళ్లీ సుప్రీంకోర్టు ముందుకు రానుంది.