రోడ్డు ప్రమాద బాధితులకు ఉచిత వైద్యం.. కేంద్రం కొత్త స్కీమ్

రోడ్డు ప్రమాదం జరిగితే డబ్బుల్లేక వైద్యం అందక ప్రాణాలు పోగొట్టుకునే పరిస్థితికి ఇక చెక్ పడనుంది. కేంద్ర ప్రభుత్వం తీసుకొచ్చిన Cashless Treatment Scheme దేశవ్యాప్తంగా అమల్లోకి వచ్చింది. మే 5, 2025 నుంచే ఈ పథకం మొదలైనప్పటికీ, చాలామందికి దీని గురించి పూర్తి అవగాహన లేదు.

ప్రమాదం జరిగిన మొదటి గంట, అంటే గోల్డెన్ అవర్‌లో వైద్యం అందకపోతేనే ఎక్కువ ప్రాణనష్టం జరుగుతుంది. దీన్ని దృష్టిలో పెట్టుకునే కేంద్ర రహదారుల రవాణా మంత్రిత్వ శాఖ ఈ Cashless Treatment Scheme రూపొందించింది.

ఈ పథకం కింద ప్రతి బాధితుడికి గరిష్టంగా ₹1.5 లక్షల వరకు ఉచిత వైద్యం అందుతుంది. ప్రమాదం జరిగిన రోజు నుంచి 7 రోజుల వరకు ఈ చికిత్స ఉచితంగా లభిస్తుంది. డబ్బులు కట్టాలన్న భయం లేకుండా ఆసుపత్రిలో వెంటనే చేర్చుకోవచ్చు.

భారతీయులే కాదు, విదేశీయులు కూడా ఈ స్కీమ్‌కి అర్హులు. ఏ రకమైన రోడ్డుపై, ఏ మోటారు వాహనం వల్ల ప్రమాదం జరిగినా ఇది వర్తిస్తుంది.

ఎక్కడ చికిత్స చేయించుకోవాలి?

ఆయుష్మాన్ భారత్ (PM-JAY) కింద నమోదైన ఆసుపత్రులు, ప్రభుత్వం నోటిఫై చేసిన ట్రామా సెంటర్లలో ఈ సేవలు అందుతాయి. ప్రమాదం జరిగిన 24 గంటల్లోపు బాధితుడిని ఆసుపత్రిలో చేర్పించాలి, స్థానిక పోలీసులకు సమాచారం ఇవ్వాలి. ఒకవేళ చేర్చిన ఆసుపత్రిలో సరైన సౌకర్యాలు లేకపోతే, మరో ఆసుపత్రికి తరలించే బాధ్యత, ఖర్చు కూడా ఆ ఆసుపత్రే భరించాలి.

హిట్ అండ్ రన్ కేసుల్లో ఇప్పటికే ఉన్న పరిహారం కూడా కొనసాగుతుంది. మరణించిన వారి కుటుంబాలకు ₹2 లక్షలు, తీవ్రంగా గాయపడిన వారికి ₹50,000 అందుతాయి.

“రాహ్‌వీర్స్”కి ₹25,000 రివార్డ్

ఫిబ్రవరి 2026లో ఇదే స్కీమ్‌ని ప్రధాని మోదీ “PM RAHAT” (Road Accident Victim Hospitalisation and Assured Treatment) పేరుతో మళ్లీ లాంచ్ చేశారు. దీనిలో కొత్తగా ఒక ఫీచర్ చేర్చారు — ప్రమాదం జరిగినప్పుడు బాధితుడిని వెంటనే ఆసుపత్రికి తీసుకెళ్లే వ్యక్తికి ప్రభుత్వం ₹25,000 రివార్డ్ ఇస్తుంది. ఇలాంటి సాయం చేసేవారిని “రాహ్‌వీర్స్” అని పిలుస్తారు. చాలామంది భయంతో, పోలీసు కేసుల్లో ఇరుక్కుంటామనే ఆందోళనతో ప్రమాద బాధితులను ఆసుపత్రికి తీసుకెళ్లడానికి వెనుకాడతారు. ఈ రివార్డ్ స్కీమ్ ఆ భయాన్ని తగ్గించి, మరింత మంది ముందుకొచ్చి సాయం చేసేలా ప్రోత్సహించడమే లక్ష్యం.

ఈ Cashless Treatment Scheme ఖర్చును మోటారు వాహన ప్రమాద నిధి ద్వారా కేంద్ర ప్రభుత్వం, బీమా కంపెనీలు కలిసి భరిస్తాయి. ప్రమాదం జరిగినప్పుడు తక్షణ సహాయం కోసం 112కి కాల్ చేయవచ్చు, లేదా e-DAR మొబైల్ యాప్ ద్వారా వివరాలు అందించవచ్చు.

రోడ్డు ప్రమాదాలు ఎక్కువగా జరిగే విజయవాడ, గుంటూరు, అమరావతి ప్రాంతాల్లో ఈ స్కీమ్ గురించి అవగాహన పెరిగితే, ఎంతోమంది ప్రాణాలు కాపాడుకోవచ్చు.