కొత్తగా 4 పోలీస్ కమిషనరేట్లు.. ఒక్క పోస్టూ కొత్తగా లేదు!

ఆంధ్రప్రదేశ్‌లో నాలుగు కొత్త పోలీస్ కమిషనరేట్ల ఏర్పాటుకు ప్రభుత్వం అనుమతి ఇచ్చింది. గుంటూరు, రాజమహేంద్రవరం, కర్నూలు, తిరుపతిలో కొత్త కమిషనరేట్ల ఏర్పాటుకు హోంశాఖ అక్టోబర్ 5న నాలుగు వేర్వేరు ఉత్తర్వులు జారీ చేసింది. అయితే ఈ నాలుగు కమిషనరేట్లకు కొత్తగా ఒక్క పోలీస్ పోస్టును కూడా మంజూరు చేయలేదు. ఇప్పటికే ఉన్న మంజూరైన పోస్టులను బదిలీ చేయడం, రీ-డిజిగ్నేట్ చేయడం ద్వారా కొత్త కమిషనరేట్ వ్యవస్థను ఏర్పాటు చేయనున్నారు.

నాలుగు కమిషనరేట్లు.. కొత్త పోస్టులు నిల్

గుంటూరు, రాజమహేంద్రవరం, కర్నూలు, తిరుపతి కమిషనరేట్ల ఏర్పాటుకు ప్రభుత్వం అనుమతి ఇచ్చినా.. కొత్త పోస్టుల సృష్టికి మాత్రం అనుమతి ఇవ్వలేదు. ఇప్పటికే ఉన్న sanctioned cadre strength నుంచే పోస్టులను షిఫ్ట్ చేసి, కొన్ని పోస్టుల హోదాలను మార్చి కమిషనరేట్లను ఏర్పాటు చేయాలని ఉత్తర్వుల్లో స్పష్టం చేసింది. కమిషనరేట్ల ఏర్పాటుతో వచ్చే అదనపు ఖర్చులను కూడా సంబంధిత శాఖకు అందుబాటులో ఉన్న బడ్జెట్ నుంచే భరించాలని ప్రభుత్వం పేర్కొంది.

గుంటూరుకు నాలుగు జోన్లు

గుంటూరు కేంద్రంగా గుంటూరు, గుంటూరు రూరల్, అమరావతి క్యాపిటల్ రీజియన్, తెనాలి జోన్లతో పోలీస్ కమిషనరేట్ ఏర్పాటు కానుంది. కమిషనర్ ఆఫ్ పోలీస్‌గా ఐజీపీ లేదా డీఐజీ స్థాయి అధికారి ఉంటారు. బీఎన్‌ఎస్‌ఎస్‌ 2023లోని సెక్షన్ 14(6) ప్రకారం ఎగ్జిక్యూటివ్ మేజిస్ట్రేట్ అధికారాలు కూడా కమిషనర్‌కు ఉంటాయి.

గుంటూరు కమిషనరేట్‌లో పోస్టుల మార్పులు

DIG Training పోస్టును గుంటూరు కమిషనర్ ఆఫ్ పోలీస్ పోస్టుగా మార్చనున్నారు. ప్రస్తుతం ఉన్న SP పోస్టును DCP-Iగా రీ-డిజిగ్నేట్ చేయనున్నారు. North Coastal Securityకు చెందిన SP పోస్టును అమరావతి క్యాపిటల్ రీజియన్ జోన్‌కు DCP-IIIగా మార్చనున్నారు. OCTOPUSలోని SP Operations పోస్టును DCP Coordinationగా మార్చనున్నారు. అలాగే CIDకు చెందిన రెండు SSP పోస్టులను గుంటూరు రూరల్, తెనాలి జోన్లకు DCPలుగా మార్చనున్నారు.

అమరావతికి ప్రత్యేక DCP జోన్

గుంటూరు కమిషనరేట్‌లో అమరావతి క్యాపిటల్ రీజియన్‌కు ప్రత్యేక జోన్ ఏర్పాటు కానుంది. ఈ జోన్‌కు DCP స్థాయి అధికారి ఉంటారు. అదనంగా నాలుగు Addl.SPs పోస్టులను Addl.DCsPగా, ఆరు DSsP పోస్టులను ACsPగా రీ-డిజిగ్నేట్ చేయనున్నారు.

రాజమహేంద్రవరానికి మూడు జోన్లు

రాజమహేంద్రవరం కేంద్రంగా మూడు టెరిటోరియల్ జోన్లతో పోలీస్ కమిషనరేట్ ఏర్పాటు కానుంది. తూర్పుగోదావరి రెవెన్యూ జిల్లా, రాజమహేంద్రవరం పోలీస్ జిల్లా పరిధినే ప్రధానంగా కమిషనరేట్ పరిధిగా నిర్ణయించారు. DIG Technical Service పోస్టును కమిషనర్ ఆఫ్ పోలీస్‌గా మార్చనున్నారు.

రాజమహేంద్రవరంలోనూ పాత పోస్టులే

రాజమహేంద్రవరం కమిషనరేట్‌లో ఇప్పటికే ఉన్న SP, ఇతర పోలీసు పోస్టులను DCPలుగా వినియోగించనున్నారు. నాలుగు Addl.SPs పోస్టులను Addl.DCsPగా, ఐదు DSsP పోస్టులను ACsPగా రీ-డిజిగ్నేట్ చేయనున్నారు. కొత్త పోస్టులు సృష్టించకుండా ఉన్న పోస్టులనే పునర్వ్యవస్థీకరించనున్నారు.

కర్నూలులో రెండు జోన్లు.. ఐదు సబ్‌డివిజన్లు

కర్నూలు కేంద్రంగా రెండు టెరిటోరియల్ జోన్లు, ఐదు సబ్‌డివిజన్లతో కమిషనరేట్ ఏర్పాటు కానుంది. కర్నూలు అర్బన్, కర్నూలు రూరల్, ఆదోని, యమ్మిగనూరు, పత్తికొండ సబ్‌డివిజన్లు ఇందులో ఉంటాయి. DIG Personnel & Organization పోస్టును కమిషనర్ ఆఫ్ పోలీస్‌గా మార్చనున్నారు.

కర్నూలులోనూ పోస్టుల రీ-డిజిగ్నేషన్

కర్నూలు కమిషనరేట్‌లో ఇప్పటికే ఉన్న SP పోస్టును DCP L&O-Iగా మార్చనున్నారు. ఇతర SP స్థాయి పోస్టులను కూడా DCPలుగా వినియోగించనున్నారు. Addl.SP, DSP స్థాయి పోస్టులను కొత్త హోదాల్లోకి మార్చడంతో పాటు నాలుగు DSsP పోస్టులను ACPలుగా రీ-డిజిగ్నేట్ చేయనున్నారు. కర్నూలు రూరల్, కర్నూలు అర్బన్, ఆదోని, యమ్మిగనూరు, పత్తికొండ ప్రాంతాలకు అనుగుణంగా ACP స్థాయి పోస్టులను ఏర్పాటు చేస్తున్నారు.

తిరుపతికి నాలుగు జోన్లు

తిరుపతి కేంద్రంగా తిరుమల, తిరుపతి, శ్రీకాళహస్తి, శ్రీ సిటీ నాలుగు జోన్లతో పోలీస్ కమిషనరేట్ ఏర్పాటు కానుంది. యాత్రికులు, పర్యాటకుల భారీ రాకపోకలు, వాహనాల రద్దీ, మతపరమైన కార్యక్రమాలు, వీఐపీ, వీవీఐపీ పర్యటనలు, శాంతిభద్రతలు, ట్రాఫిక్, నేర నియంత్రణ వంటి అంశాలను దృష్టిలో పెట్టుకుని కమిషనరేట్ ఏర్పాటు చేస్తున్నట్లు ప్రభుత్వం పేర్కొంది.

తిరుపతిలో 53 పోలీస్ స్టేషన్ల వ్యవస్థే ఆధారం

ప్రస్తుతం ఉన్న తిరుపతి పోలీస్ జిల్లాలో 53 పోలీస్ స్టేషన్లు ఉన్నాయని ప్రభుత్వం ఉత్తర్వుల్లో పేర్కొంది. ఇప్పటికే ఉన్న పోలీస్ సంస్థాగత వ్యవస్థ, sanctioned strengthనే కొత్త కమిషనరేట్‌కు ప్రాథమిక వ్యవస్థగా ఉపయోగించనున్నారు. కొత్త కమిషనరేట్ నిర్మాణంలో ప్రస్తుత బలగాలను హేతుబద్ధంగా వినియోగించనున్నారు.

విజయవాడ పోస్టులు తిరుపతికి

తిరుపతి కమిషనరేట్ ఏర్పాటులో మరో కీలక అంశం ఉంది. విజయవాడ సిటీకి చెందిన కొన్ని పోస్టులను తిరుపతి కమిషనరేట్‌కు షిఫ్ట్ చేయనున్నారు. Jt. CP Crimes, Vijayawada City పోస్టును తిరుపతి కమిషనర్ ఆఫ్ పోలీస్‌గా మార్చనున్నారు. DCP Traffic, Vijayawada City పోస్టును DCP-Tirupatiగా మార్చాలని ఉత్తర్వుల్లో పేర్కొన్నారు. అలాగే ఇతర విభాగాలకు చెందిన పోస్టులను కూడా తిరుపతి కమిషనరేట్‌లో DCP స్థాయి పోస్టులుగా వినియోగించనున్నారు.

12 DSsP పోస్టులు ACsPలుగా

తిరుపతి కమిషనరేట్‌లో ఇప్పటికే ఉన్న నాలుగు Addl.SP పోస్టులను Addl.DCsPగా రీ-డిజిగ్నేట్ చేయనున్నారు. 12 DSsP పోస్టులను ACsP పోస్టులుగా మార్చనున్నారు. తిరుమల, తిరుపతి, చంద్రగిరి, శ్రీకాళహస్తి, రేణిగుంట, శ్రీ సిటీ, పుత్తూరు, నాయుడుపేటతో పాటు క్రైమ్, ట్రాఫిక్ తదితర విభాగాలకు ACP స్థాయి పోస్టులను ఏర్పాటు చేయనున్నారు.

కమిషనరేట్లు కొత్త.. పోస్టులు మాత్రం పాతవే

మొత్తంగా రాష్ట్రంలో నాలుగు కొత్త పోలీస్ కమిషనరేట్లు ఏర్పడుతున్నా.. వాటి కోసం ప్రత్యేకంగా కొత్త పోలీస్ పోస్టులు మాత్రం మంజూరు కాలేదు. ఇప్పటికే ఉన్న పోలీసు పోస్టులను ఒక ప్రాంతం నుంచి మరో ప్రాంతానికి షిఫ్ట్ చేయడం, ఉన్న పోస్టుల హోదాలను మార్చడం ద్వారా కొత్త కమిషనరేట్ వ్యవస్థను ప్రభుత్వం ఏర్పాటు చేస్తోంది.