టెలిగ్రామ్ యజమాని ఇప్పుడు ఉగ్రవాద కేసులో వాంటెడ్!

టెలిగ్రామ్ వ్యవస్థాపకుడు, CEO పావెల్ దురోవ్‌పై రష్యా కొరడా ఝళిపించింది. ఆయన్ని అంతర్జాతీయ వాంటెడ్ లిస్ట్‌లో చేర్చుతూ రష్యా భద్రతా సంస్థ FSB జూలై 29, 2026న సంచలన ప్రకటన చేసింది. టెర్రరిజంకు సహకరించారన్న తీవ్ర ఆరోపణలతో ఆయనపై అభియోగాలు మోపారు.

ఆరోపణలు ఏంటి?

ఉక్రెయిన్ ఇంటెలిజెన్స్, తీవ్రవాద సంస్థలకు సంబంధించిన ఛానెళ్లు, బాట్లను తొలగించడంలో దురోవ్ విఫలమయ్యారని అధికారుల ఆరోపణ. టెలిగ్రామ్ నిర్వహణ రష్యాలో అనేక ప్రాణనష్టాలకు కారణమైన విధ్వంసం, ఉగ్రవాద చర్యలు, సామూహిక హత్యలు, సైబర్ మోసాలకు వేదికగా మారిందని, ఈ కంటెంట్‌ను తొలగించలేదని FSB మండిపడింది.

డేటింగ్ బాట్‌తో యువతను వల్లో వేసుకున్నారా?

ఉక్రెయిన్ భద్రతా సంస్థలు టెలిగ్రామ్‌లోని ఒక ప్రసిద్ధ డేటింగ్ చాట్‌బాట్‌ను వాడి రష్యన్లను సాబోటేజ్, ఉగ్రవాద కార్యకలాపాలకు ఆకర్షించి రిక్రూట్ చేశారని FSB ఆరోపించింది. జూలై 2025 నుంచి 12-22 సంవత్సరాల వయసున్న 46 మంది యువతను పోలీసులపై దాడులు, నిప్పుపెట్టడం వంటి చర్యలకు అరెస్టు చేసినట్టు వెల్లడించింది.

నేపథ్యం ఏంటి?

రష్యాలో పుట్టి, అక్కడే కెరీర్ ప్రారంభించిన దురోవ్, ఆ తర్వాత దేశం విడిచి వెళ్లిపోయారు. 2022లో ఉక్రెయిన్‌పై పూర్తిస్థాయి దాడి మొదలుపెట్టినప్పటి నుంచి ఇంటర్నెట్‌ను క్రెమ్లిన్ నియంత్రణలోకి తెచ్చే ప్రయత్నం ఉధృతమైంది. ఇందులో భాగంగానే టెలిగ్రామ్‌పై రష్యా ఆంక్షలు కూడా విధిస్తోంది.

దురోవ్ స్పందన, భవిష్యత్ శిక్ష

ఈ ఏడాది ప్రారంభంలోనే తనపై క్రిమినల్ దర్యాప్తు మొదలైందని దురోవ్ ప్రకటించారు. గోప్యత, భావప్రకటన స్వేచ్ఛను అణచివేయడానికి టెలిగ్రామ్‌ను నిరోధించేందుకు నెపాలు సృష్టిస్తున్నారని రష్యాపై ఆరోపణలు చేశారు. దోషిగా తేలితే జీవితఖైదు తప్పదు. FSB ప్రకటనపై దురోవ్ ఒక ఫింగర్ సెల్యూట్‌తో స్పందించడం చర్చనీయాంశమైంది.

ప్రస్తుతం టెలిగ్రామ్ కంపెనీ దుబాయ్‌లో ఉంది, దురోవ్ కూడా రష్యా వెలుపలే ఉంటున్నారు కాబట్టి ఈ వాంటెడ్ లిస్ట్ నామమాత్రమేనని, ప్రస్తుతానికి ఆచరణాత్మక ప్రభావం తక్కువేనని పరిశీలకులు భావిస్తున్నారు.