ట్రైనీ ఐపీఎస్ ఉదయ్ కృష్ణారెడ్డి కేసులో రోజుకో మలుపు
ఒకప్పుడు సివిల్స్ అభ్యర్థులకు ఆదర్శంగా నిలిచిన యువ అధికారి. కానిస్టేబుల్గా ఉద్యోగంలో చేరి.. విధులు నిర్వహిస్తూనే UPSCలో విజయం సాధించి ఐపీఎస్గా ఎంపికయ్యారు. కానీ ఇప్పుడు అదే అధికారి సహ ట్రైనీ మహిళా ఐపీఎస్ అధికారిణి ఫిర్యాదుతో లైంగిక వేధింపుల కేసులో నిందితుడిగా మారారు. సర్దార్ వల్లభ్భాయ్ పటేల్ నేషనల్ పోలీస్ అకాడమీ (SVPNPA)లో చోటుచేసుకున్న ఈ ఘటన.. సస్పెన్షన్, ఆత్మహత్యాయత్నం, సూసైడ్ నోట్, డిజిటల్ ఆధారాల పరిశీలనతో రోజుకో మలుపు తిరుగుతోంది.
ఎం. ఉదయ్ కృష్ణారెడ్డి 2013లో ఆంధ్రప్రదేశ్ పోలీసు శాఖలో కానిస్టేబుల్గా చేరారు. ఉద్యోగం చేస్తూనే సివిల్స్కు సిద్ధమై 2023లో ఇండియన్ రైల్వే మేనేజ్మెంట్ సర్వీస్ (IRMS)కు ఎంపికయ్యారు. అక్కడితో ఆగకుండా మరోసారి UPSC రాసి మెరుగైన ర్యాంకుతో 2024లో ఐపీఎస్ సాధించారు. సాధారణ కుటుంబం నుంచి ఐపీఎస్ వరకు ఎదిగిన ఆయన ప్రయాణం సోషల్ మీడియాలోనూ, సివిల్స్ అభ్యర్థుల్లోనూ ప్రేరణగా నిలిచింది.
అయితే హైదరాబాద్లోని నేషనల్ పోలీస్ అకాడమీలో శిక్షణ పొందుతున్న సమయంలోనే సహ ట్రైనీ మహిళా ఐపీఎస్ అధికారిణి అత్తాపూర్ పోలీస్ స్టేషన్లో ఫిర్యాదు చేయడంతో పరిస్థితి ఒక్కసారిగా మారిపోయింది. తనను కొంతకాలంగా వేధిస్తున్నారని, వెంటపడుతున్నారని, శారీరకంగా దాడి చేశారని, బెదిరించారని, అనుమతి లేకుండా వ్యక్తిగత వీడియోలు రికార్డు చేసి వాటితో ఒత్తిడి తీసుకొచ్చారని ఆమె ఫిర్యాదులో ఆరోపించారు. ఈ ఫిర్యాదు ఆధారంగా పోలీసులు భారతీయ న్యాయ సంహిత (BNS), ఐటీ చట్టంలోని పలు సెక్షన్ల కింద కేసు నమోదు చేశారు.
ఈ ఆరోపణలను ఉదయ్ కృష్ణారెడ్డి అంగీకరించడం లేదు. ఆయన రాసినట్లు ప్రచారంలోకి వచ్చిన సూసైడ్ నోట్లో మాత్రం ఇద్దరి మధ్య పరస్పర సమ్మతితోనే సంబంధం కొనసాగిందని, తన వద్ద దానికి సంబంధించిన చాట్లు, డిజిటల్ ఆధారాలు ఉన్నాయని పేర్కొన్నట్లు పలు మీడియా కథనాలు వెల్లడించాయి. అయితే ఆ లేఖ ప్రామాణికతను పోలీసులు ఇప్పటివరకు అధికారికంగా ధృవీకరించలేదు. దానిని కూడా దర్యాప్తులో భాగంగానే పరిశీలిస్తున్నారు.
ఈ కేసులో డిజిటల్ ఆధారాలే కీలకంగా మారాయి. ఇద్దరి వాట్సాప్ చాట్లు, కాల్ డేటా, మొబైల్ ఫోన్లలోని సమాచారం, వీడియోలు, అకాడమీ సీసీటీవీ ఫుటేజ్, ఇతర ట్రైనీ అధికారుల వాంగ్మూలాలను పోలీసులు పరిశీలిస్తున్నారు. అవసరమైతే ఫోరెన్సిక్ పరీక్షలకు కూడా పంపే అవకాశం ఉందని సమాచారం.
మరోవైపు మహిళా అధికారిణి ఫిర్యాదు అందిన వెంటనే SVPNPA అంతర్గత విచారణ ప్రారంభించింది. అందుబాటులో ఉన్న ప్రాథమిక సమాచారం, సీసీటీవీ ఫుటేజ్ ఆధారంగా ఆరోపణల్లో ప్రాథమికంగా విచారణకు తగిన అంశాలు ఉన్నాయని భావించిన అకాడమీ.. ఉదయ్ కృష్ణారెడ్డిని ట్రైనింగ్ నుంచి సస్పెండ్ చేసింది. అయితే ఇది తుది నిర్ణయం కాదని, పూర్తి దర్యాప్తు అనంతరం కేంద్ర సిబ్బంది, శిక్షణ శాఖ (DoPT) తదుపరి నిర్ణయం తీసుకోనుంది.
ఈ పరిణామాల మధ్య ఉదయ్ కృష్ణారెడ్డి ఆత్మహత్యాయత్నానికి పాల్పడిన ఘటన మరోసారి కలకలం రేపింది. సోదరుడి ఇంట్లో అస్వస్థతకు గురైన ఆయనను కుటుంబ సభ్యులు వెంటనే ఆస్పత్రికి తరలించారు. మొదట విషం తీసుకున్నారనే ప్రచారం జరిగినా, ప్రాథమిక వైద్య పరీక్షల్లో కడుపులో విషపదార్థం ఆనవాళ్లు కనిపించలేదని సమాచారం వెలువడింది. పూర్తి ఫోరెన్సిక్ నివేదికల కోసం పోలీసులు ఎదురుచూస్తున్నారు.
ప్రస్తుతం ఈ కేసు రెండు దిశల్లో కొనసాగుతోంది. ఒకవైపు హైదరాబాద్ పోలీసులు క్రిమినల్ కేసును దర్యాప్తు చేస్తుండగా, మరోవైపు పోలీస్ అకాడమీ అంతర్గత క్రమశిక్షణా విచారణ కొనసాగుతోంది. బాధిత అధికారిణి వాంగ్మూలం, డిజిటల్ ఆధారాలు, సాక్షుల వాంగ్మూలాలు, ఫోరెన్సిక్ నివేదికల ఆధారంగా తదుపరి చర్యలు ఉండనున్నాయి. ఉదయ్ కృష్ణారెడ్డి ఆరోగ్యం పూర్తిగా కోలుకున్న తర్వాత ఆయన వాంగ్మూలాన్ని కూడా నమోదు చేసే అవకాశం ఉంది.
ఈ కేసులో చాట్లు, వీడియోలు, మొబైల్ డేటా, ఫోరెన్సిక్ నివేదికలు కీలకంగా మారనున్నాయి. అవి మహిళా అధికారిణి ఆరోపణలను బలపరుస్తాయా? లేక ఉదయ్ కృష్ణారెడ్డి వాదనకు మద్దతు ఇస్తాయా? అన్నది దర్యాప్తులో తేలాల్సి ఉంది. అప్పటి వరకు ఈ కేసులో వచ్చిన ఆరోపణలు, ప్రత్యారోపణలను తుది వాస్తవాలుగా పరిగణించలేమని న్యాయ నిపుణులు అభిప్రాయపడుతున్నారు.
300×250
Google AdSense