జగన్‌ నంబర్‌ టూనా? విజయసాయి మాటకు సజ్జల కౌంటర్ షాట్‌

విజయసాయిరెడ్డి ఒక్కో బాంబు పేల్చారు. సజ్జల రామకృష్ణారెడ్డి అంతే స్పీడుగా ఒక్కో దానికి కౌంటర్‌ ఇచ్చారు. ఇద్దరి మధ్య మాటల యుద్ధం ఇప్పుడు పార్టీ కేడర్‌నే కాదు, రాష్ట్రం మొత్తాన్నీ ఆసక్తిగా చూసేలా చేస్తోంది.

విజయసాయి: జగన్‌ నంబర్‌ టూ, నేనే నంబర్‌ వన్‌.
సజ్జల: పార్టీలో నంబర్‌ వన్‌, నంబర్‌ టూ అనే ప్రశ్నే లేదు. జగన్‌ లేని వైయస్సార్‌సీపీకి అర్థమే లేదు.

విజయసాయి: నన్ను పార్టీలో వెనక్కి నెట్టేశారు, ఎదగనివ్వలేదు.
సజ్జల: రాజ్యసభ సభ్యత్వం రెండుసార్లు, జాతీయ ప్రధాన కార్యదర్శి పదవి, క్యాబినెట్‌ హోదాతో ప్రభుత్వ ప్రత్యేక ప్రతినిధి బాధ్యత — ఇన్ని ఇచ్చాక ఎదగనివ్వలేదంటే ఎలా కుదురుతుంది? 2020 నుంచే తగ్గించారంటే, 2022లో రెండోసారి రాజ్యసభకు ఎందుకు పంపారు?

విజయసాయి: సజ్జల వల్లే పార్టీ వదిలేయాల్సి వచ్చింది.
సజ్జల: పార్టీ వదిలేటప్పుడు మీరే స్వయంగా చెప్పారు కదా — “వ్యక్తిగత కారణాలే, సజ్జల వల్ల కాదు” అని. ఇప్పుడు మాట మార్చడం ఎందుకు?

విజయసాయి: జగన్‌ మతమార్పిడులను ప్రోత్సహించారు.
సజ్జల: ఇది అత్యంత దారుణమైన ఆరోపణ. నలభై ఏళ్లుగా వైయస్‌ కుటుంబంతో పరిచయం ఉందని చెప్పుకునే మీకే వైయస్‌ కుటుంబం అన్ని మతాలను ఎలా గౌరవించిందో బాగా తెలుసు.

విజయసాయి: 74 సార్లు అవమానించారు, భౌతిక దాడి చేశారు.
సజ్జల: నిజంగా జరిగితే పోలీసులకు ఫిర్యాదు చేయండి. ఈ ప్రభుత్వం వెంటనే స్పందిస్తుంది.

కొత్త పార్టీ పెట్టుకోవడం విజయసాయి హక్కు అని సజ్జల అంగీకరిస్తూనే, దానికి ప్రచారం కోసం జగన్‌ను టార్గెట్‌ చేయడం మానుకోవాలని హెచ్చరించారు. “మన సాయిరెడ్డి” అనుకుని ఇన్నాళ్లూ సంయమనం పాటించామని, ఇదే ధోరణి కొనసాగితే సమాధానం ఇంకా ఘాటుగా ఉంటుందని స్పష్టం చేశారు.