విజయసాయి కొత్త పార్టీ.. ఎందుకు? ఎవరి కోసం? అసలు వ్యూహం ఇదే
తిరుమల శ్రీవారిని కుటుంబ సమేతంగా దర్శించుకుని కొత్త పార్టీ ప్రకటన చేశారు విజయసాయిరెడ్డి. ప్రజల కోసం, ప్రజా పక్షంగా అంటూ ఆయన చెప్పిన మాటలు వినడానికి బాగానే ఉన్నాయి. కానీ అసలు ప్రశ్న అదే.. ఈ పార్టీ ఎందుకు? ఎవరి కోసం? ఎప్పుడు అర్థమైంది ఈ నిర్ణయం తీసుకోవాల్సిన అవసరం?
వైసీపీలో జగన్కు అత్యంత సన్నిహితుడిగా, పార్టీ వ్యూహకర్తగా ఏళ్ల తరబడి పనిచేశారు విజయసాయి. రాజ్యసభ సభ్యుడిగా కూడా కొనసాగారు. కానీ 2024 ఎన్నికల్లో వైసీపీకి ఎదురైన ఘోర పరాజయం తర్వాత పరిస్థితులు మారిపోయాయి. పార్టీలోని కొందరు కీలక నేతల వల్లే తీవ్రంగా నష్టపోయామని ఆయన బహిరంగంగానే విమర్శించారు. ఆ తర్వాత రాజ్యసభ సభ్యత్వానికి రాజీనామా చేసి, క్రియాశీల రాజకీయాలకు పూర్తిగా దూరమయ్యారు.
రాజకీయ సన్యాసం ప్రకటించిన విజయసాయి, వ్యవసాయమే తన వ్యాపకం అని కూడా చెప్పుకున్నారు. కానీ ఏడాదిన్నర తిరగకుండానే మళ్లీ పాలిటిక్స్ వైపు అడుగులు వేయడం మొదలుపెట్టారు. ఈ మధ్యలో ఆయన పేరు అనేక దిక్కులకు ముడిపడింది. టీడీపీలో చేరతారని ఒక ప్రచారం, బీజేపీలో చేరతారని మరో ప్రచారం, చివరికి వైసీపీలోకే వెనక్కి వస్తారని ఇంకో ప్రచారం.. ఇలా విజయసాయి రాజకీయ భవిష్యత్తుపై రకరకాల ఊహాగానాలు నడిచాయి.
ఈ మూడు దారుల్లో ఏదీ ఫలించలేదన్నది ఇప్పుడు స్పష్టమవుతోంది. బీజేపీలో చేరాలని చూసినా కూటమి పక్షాల నుంచి అభ్యంతరాలు ఎదురయ్యాయని టాక్. వైసీపీలోకి వెనక్కి వెళ్దామనుకున్నా, జగన్ కోటరీగా పేరుపడిన నేతల నుంచి తీవ్ర వ్యతిరేకత ఎదురైందన్న ప్రచారం మరోవైపు నడిచింది. ఈ రెండు తలుపులు మూసుకుపోయిన తర్వాతే సొంత పార్టీ ఆలోచనకు పదును పెట్టారా అన్నది ఇప్పుడు రాజకీయ వర్గాల్లో జోరుగా చర్చ జరుగుతోంది.
ఇక్కడ మరో ముఖ్యమైన కోణం ఉంది. హిందుత్వ అనుకూల వ్యాఖ్యలు చేస్తూ వస్తున్న విజయసాయి, తన పార్టీని పూర్తి హిందుత్వ భావజాలంతో, బీజేపీకి దగ్గరగా ఉండేలా తీర్చిదిద్దుతారన్న అభిప్రాయం బలంగా వినిపిస్తోంది. వైసీపీపై ఉన్న హిందుత్వ వ్యతిరేక ముద్రను చెరిపేసుకుని, తనకంటూ ప్రత్యేక గుర్తింపు తెచ్చుకునేందుకే ఈ ఎత్తుగడ అన్నది విశ్లేషకుల మాట. అదే సమయంలో సమానత్వం, కులాలకు అతీతంగా సామాజిక న్యాయం లాంటి అంశాలను కూడా పార్టీ అజెండాలో చేర్చినట్లు సమాచారం.
పార్టీ లక్ష్య వర్గం ఎవరన్నది చూస్తే మహిళలు, యువత, రైతులు అని బహిరంగంగా చెబుతున్నారు. డబ్బు లేని రాజకీయంపై ఫోకస్ పెడతానని కూడా సంకేతాలు ఇచ్చారు. కానీ లోతుగా చూస్తే అసలు గురి వైసీపీ నుంచి బయటకు రాలేని రెండో శ్రేణి నేతలపైనే ఉందని స్పష్టమవుతోంది. ప్రధాన పార్టీల్లోని బడా నేతలు తమ స్థానాలను వదులుకుని కొత్త పార్టీలో చేరే అవకాశం తక్కువ. కానీ నియోజకవర్గ స్థాయిలో అవకాశాలు రాక ఇరుక్కుపోయిన నేతలకు ఇది ఒక ప్రత్యామ్నాయ వేదికగా మారే అవకాశం ఉంది.
టైమింగ్ కూడా చాలా కీలకమైనది. త్వరలో నియోజకవర్గాల పునర్విభజన జరగబోతోందన్న ప్రచారం నేపథ్యంలో ఈ పార్టీ ప్రకటన రావడం యాదృచ్ఛికం కాదన్న వాదన బలంగా ఉంది. పునర్విభజన తర్వాత కొత్తగా ఏర్పడే స్థానాల్లో పోటీ చేసేందుకు సిద్ధంగా ఉండే రాజకీయ వేదికను ముందుగానే సిద్ధం చేసుకుంటున్నారన్నది కొందరి విశ్లేషణ. ఉత్తరాంధ్ర, రాయలసీమ ప్రాంతాల నుంచి వైసీపీ మాజీ నేతలు తనవైపు వచ్చే అవకాశం ఉందని విజయసాయి అంచనా వేస్తున్నట్లు తెలుస్తోంది.
మీడియా వ్యూహం కూడా ఈ పార్టీ ప్రణాళికలో భాగంగా కనిపిస్తోంది. డిజిటల్ మీడియా ఏర్పాటు ఇప్పటికే పూర్తయిందని, తెలుగులో శాటిలైట్ చానల్ కూడా తీసుకురానున్నట్లు గతంలోనే సంకేతాలు ఇచ్చారు. సొంత మీడియా వేదిక ఉంటే, పార్టీ ప్రచారానికి, భవిష్యత్ రాజకీయ కథనానికి పూర్తి నియంత్రణ తన చేతుల్లోనే ఉంటుందన్నది ఆయన వ్యూహంగా కనిపిస్తోంది.
మరో కోణం కూడా వినిపిస్తోంది. ఇదంతా జగన్ను బ్లాక్మెయిల్ చేసేందుకు పన్నిన స్క్రిప్ట్ మాత్రమేనన్న ఆరోపణలు వైసీపీ అంతర్గత వర్గాల నుంచి వస్తున్నాయి. వైసీపీలో ఇప్పటికీ అసంతృప్తితో ఉన్న నేతలను కూడగట్టి, బేరసారాలకు వాడుకునేందుకే ఈ పార్టీ ప్రకటన అన్నది వారి వాదన. కొత్త పార్టీ ప్రకటన ఒత్తిడి తీసుకువచ్చి, చివరికి వైసీపీలోనే మెరుగైన స్థానంతో వెనక్కి వెళ్లేందుకు ఇదొక ఎత్తుగడ కావచ్చన్న అనుమానాలు కూడా వ్యక్తమవుతున్నాయి.
చార్టెడ్ అకౌంటెంట్గా వృత్తి జీవితం మొదలుపెట్టిన విజయసాయి, తర్వాత రాజకీయాల్లో లెక్కల మాస్టారుగా పేరు తెచ్చుకున్నారు. ప్రతి నిర్ణయాన్ని లెక్కప్రకారమే ఆచితూచి తీసుకుంటారన్న పేరు ఆయనకుంది. అందుకే ఈ కొత్త పార్టీ నిర్ణయం వెనుక కూడా ఒక పకడ్బందీ ప్రణాళిక ఉండే అవకాశమే ఎక్కువగా కనిపిస్తోంది.
మొత్తానికి ప్రజల గొంతుక అంటూ మొదలైన ఈ ప్రకటన వెనుక వ్యక్తిగత రాజకీయ మనుగడ పోరాటం స్పష్టంగా కనిపిస్తోంది. పార్టీ పేరు, జెండా, భవిష్యత్ రోడ్మ్యాప్ వివరాలను ఈ నెలలోనే విజయవాడలో మీడియా సమావేశం పెట్టి అధికారికంగా ప్రకటిస్తానని విజయసాయి చెప్పారు. కానీ అసలు లక్ష్యాలు, పార్టీ వెనుక ఉన్న నిజమైన వ్యూహం మాత్రం ఇంకా బహిరంగం కాలేదు. ఇది ఏపీ రాజకీయాల్లో నిజమైన మార్పు తీసుకొస్తుందా, లేక వైసీపీపై ఒత్తిడి పెంచే తాత్కాలిక ఎత్తుగడేనా అన్నది రాబోయే రోజుల్లో తేలనుంది.
300×250
Google AdSense