“వెలిగొండ పండుగ వద్ద కలుద్దాం” — సీఎం చంద్రబాబు పిలుపు

ముఖ్యమంత్రి చంద్రబాబు ట్వీట్‌ ఒక్కటే ఇప్పుడు నెట్టింట వైరల్‌గా మారింది. “రేపు వెలిగొండ పండుగ వద్ద కలుద్దాం” అంటూ ఆయన ఇచ్చిన పిలుపు ప్రజల్లో కొత్త ఉత్సాహాన్ని నింపింది. మార్కాపురం జిల్లా రేపు కొత్త చరిత్రకు వేదిక కాబోతోంది.

మూడు దశాబ్దాలుగా పశ్చిమ ప్రకాశం ప్రజలు కంటున్న కల ఇప్పుడు నిజం కాబోతోంది. నల్లమల కొండల్ని చీల్చుకుంటూ కృష్ణమ్మ జలాలు నల్లమల సాగర్‌లోకి దూసుకురానున్నాయి. 1996లో మొదలైన వెలిగొండ ప్రాజెక్టు తొలి దశ ఇప్పుడు పూర్తయ్యింది. రేపు దీన్ని సీఎం లాంఛనంగా ప్రారంభించనున్నారు.

ఈ ప్రాజెక్టు వల్ల ఎంత మార్పు రాబోతోందో తెలుసా? 1.19 లక్షల ఎకరాలకు సాగునీరు, 4 లక్షల మందికి తాగునీరు అందనుంది. కరవుతో అల్లాడిన రైతన్నలకు ఇక కొత్త భరోసా. ఫ్లోరైడ్‌ బాధిత గ్రామాలకు ఆరోగ్య రక్షణ. ఉపాధి కోసం వలస వెళ్లిన యువతకు సొంతూళ్లోనే భవిష్యత్తు దొరకనుంది.

ఈ మహాయజ్ఞం వెనుక ఎంతోమంది త్యాగం దాగుంది. ప్రాజెక్టు కోసం 11 గ్రామాల ప్రజలు తమ భూములు, ఇళ్లు, పుట్టిపెరిగిన ఊళ్లను వదులుకున్నారు. వారికి సీఎం చంద్రబాబు శిరస్సు వంచి కృతజ్ఞతలు తెలిపారు.

రేపటి కార్యక్రమం కేవలం ఒక ప్రాజెక్టు ప్రారంభోత్సవం మాత్రమే కాదు. మూడు జిల్లాల్లో లక్షల మంది జీవితాల్లో వెలుగులు నింపే మలుపు. దశాబ్దాల నీటి కష్టాలకు ముగింపు పలికే రోజు రానే వచ్చింది. “వెలిగొండ పండుగ” వద్ద కలుద్దామంటూ సీఎం ఇచ్చిన పిలుపుతో ప్రజలంతా ఆ క్షణం కోసం ఎదురుచూస్తున్నారు.