🌤 వాతావరణం
38°C
🥇 బంగారం
₹94,200
⛽ పెట్రోల్
₹108.76
ఎండలోకి వెళ్లే ముందు సన్స్క్రీన్ కొంటాం. డబ్బా మీద SPF 30 ఉందా, 50 ఉందా అని చూస్తాం. ఆ ఒక్క నంబర్ చూడగానే అది ఎంత పనిచేస్తుందో మనకే అర్థమైపోతుంది.
మరి మన జిల్లా పాలన ఎలా ఉంది? కలెక్టర్ ఆఫీసు ఎంత వేగంగా పనిచేస్తోంది? ఇది తెలుసుకోవడానికి కూడా అలాంటి ఒక్క నంబర్ ఉంటే?
సరిగ్గా ఇదే ఆలోచన అమరావతిలో జరుగుతున్న 8వ జిల్లా కలెక్టర్ల సదస్సులో చర్చకు వచ్చింది. సామాన్య పౌరుడు కూడా తన జిల్లా పాలనా పనితీరును సులభంగా తెలుసుకునేలా ఒక రేటింగ్ విధానం ఉండాలని ఈ సదస్సులో ప్రస్తావించారు.
సచివాలయంలో గురువారం ఈ సదస్సు మొదలైంది. ముఖ్యమంత్రి చంద్రబాబు నాయుడు నేతృత్వంలో జరుగుతున్న ఈ సమావేశంలో ఈసారి ఒక కొత్త ప్రయోగం జరిగింది.
కలెక్టర్ల సదస్సుల చరిత్రలోనే మొదటిసారి, అధికారుల నాయకత్వ నైపుణ్యాలపై ప్రత్యేక సెషన్ పెట్టారు. ఆ సెషన్లోనే ఈ రేటింగ్ ఆలోచన బయటకు వచ్చింది.
ఇదే సెషన్లో మరో ఆసక్తికరమైన అంశం చర్చకు వచ్చింది. అదే Gen Z. నేటి తరం ఉద్యోగులు కేవలం జీతం, ఉద్యోగ భద్రత కోసమే పనిచేయడం లేదు. తమ ఎదుగుదలకే ప్రాధాన్యం ఇస్తున్నారు.
పని వాతావరణం నచ్చకపోతే? సులభంగా ఉద్యోగం మారిపోతున్నారు. అందుకే అధికారులు ఈ కొత్త తరం మనస్తత్వాన్ని అర్థం చేసుకోవాలని సూచించారు.
హోదాతో కాదు, సామర్థ్యంతోనే అసలైన గౌరవం వస్తుంది. నాలెడ్జ్, పనితీరు, వ్యక్తిత్వంతోనే అధికారులు తమ సిబ్బంది నమ్మకాన్ని గెలుచుకోవాలన్నది ఈ సెషన్ సారాంశం.
నాయకత్వంలో మహిళలు, పురుషులు అనే తేడా గత కాలపు మాట అని, ఇప్పుడు ఆ వ్యత్యాసం లేదని సీఎం అన్నారు. ప్రజల అంచనాలకు తగ్గట్టు కలెక్టర్లు తమ ఆలోచనా విధానాన్ని మార్చుకోవాలన్నారు.
ఇక కలెక్టర్లకు సీఎం స్పష్టమైన సందేశం ఇచ్చారు. “రివ్యూలు కాదు… రిజల్ట్స్ కావాలి” అని తేల్చి చెప్పారు. గంటల తరబడి సమీక్షలు చేస్తే సరిపోదన్నారు.
మభ్యపెట్టే నివేదికలు వద్దని, వాస్తవ నివేదికలే కావాలని అన్నారు. సమస్య వచ్చాక స్పందించడం కాదు, ముందే మేల్కోవాలని, రియాక్టివ్ నుంచి ప్రో యాక్టివ్గా మారాలని సూచించారు.
ప్రతి జిల్లాకు 25, ప్రతి నియోజకవర్గానికి 10 నుంచి 15 ప్రాధాన్యతాంశాలను గుర్తించాలని ఆదేశించారు. కలెక్టర్లు, అధికారులు, మంత్రుల మధ్య పోటీ ఉండాలని కూడా చెప్పారు.
“కరవు ప్రాంతాలకు నీళ్లిస్తేనే నాకు సంతృప్తి” అని చంద్రబాబు అన్నారు. సాగునీటి రంగంలో చేసిన కృషికి ‘వాటర్ మ్యాన్’గా పేర్కొంటూ సదస్సులో ఆయనకు స్టాండింగ్ ఒవేషన్ లభించింది.
మరోవైపు, అర్బన్ డేటా బేస్ను ఆర్టీజీఎస్తో అనుసంధానం చేస్తున్నామని అధికారులు సీఎంకు వివరించారు. తాగునీటికి అత్యంత ప్రాధాన్యం ఇస్తున్నామని చెప్పారు.
అన్ని జిల్లాల్లో భూముల లభ్యతపై ఒక సమగ్ర వెబ్సైట్ రూపొందిస్తున్నామని, గత సదస్సు నిర్ణయాలను గడువులోపే పూర్తి చేస్తున్నామని కూడా తెలిపారు.
“ఆలోచనలతో పాటు అమలూ ఉండాలి” అని ఇదే సదస్సులో సీఎం స్వయంగా అన్నారు. SPF లాంటి రేటింగ్ ఆలోచనకూ అదే వర్తిస్తుంది కదా!
మరి ఈ రేటింగ్ నిజంగా అమల్లోకి వస్తుందా? వస్తే, మీ జిల్లా పాలనకు మీరు ఎంత రేటింగ్ ఇస్తారు?
