🌤 వాతావరణం
38°C
🥇 బంగారం
₹94,200
⛽ పెట్రోల్
₹108.76
పోటీలే జరగలేదు. కానీ ఆ పోటీల్లో గెలిచినట్టు సర్టిఫికెట్లు ఉన్నాయి. ఆ సర్టిఫికెట్లతో పరీక్ష రాయకుండానే టీచర్ ఉద్యోగాలు వచ్చేశాయి. మెగా డీఎస్సీ-2025 స్పోర్ట్స్ కోటా నియామకాల్లో ఇలాంటి కేసులను వైఎస్సార్సీపీ అధినేత వైఎస్ జగన్ ఆధారాలతో సహా బయటపెట్టారు. తాడేపల్లిలో గురువారం ప్రెస్మీట్ పెట్టి, సర్టిఫికెట్లు, అధికారిక పత్రాలను ప్రజెంటేషన్ ద్వారా స్క్రీన్పై చూపించారు. ఒక్కో కేస్ స్టడీని వివరంగా వివరించారు. ఇది మెగా డీఎస్సీ కాదని, నిరుద్యోగులను దగా చేసిన డీఎస్సీ అని జగన్ అన్నారు. తవ్వేకొద్దీ ఒక్కో అక్రమం బయటకు వస్తోందన్నారు.
జూడో పేరుతో 39 పోస్టులు
జగన్ చూపించిన జాబితా ప్రకారం, ఒక్క జూడో పేరుతోనే 39 మందికి ఎలాంటి పరీక్ష లేకుండా టీచర్ పోస్టులు ఇచ్చారు. వీరిలో కొందరు 2013లో ఖమ్మంలో జరిగిన సీనియర్ ఇంటర్ డిస్ట్రిక్ట్ జూడో ఛాంపియన్షిప్లో గెలిచినట్టు సర్టిఫికెట్లు పెట్టారు. ఆ సర్టిఫికెట్లు ఏపీ జూడో అసోసియేషన్ ఇచ్చినవి. కానీ ఆ తేదీల్లో ఖమ్మంలో అలాంటి పోటీలే జరగలేదని తెలంగాణ జూడో అసోసియేషన్, ఖమ్మం జిల్లా జూడో అసోసియేషన్ రాతపూర్వకంగా చెప్పాయి. ఆ విషయాన్ని జగన్ ఆధారాలతో చూపించారు.
అసోసియేషన్ అధ్యక్షుడు ఎవరు?
మరి ఏపీ జూడో అసోసియేషన్ అధ్యక్షుడు ఎవరు? మంత్రి లోకేష్ తోడల్లుడు, విశాఖ ఎంపీ భరత్ అని జగన్ గుర్తుచేశారు. దొంగ సర్టిఫికెట్లు పుట్టించారని, వాటికి రాష్ట్రంలోని పెద్దలే ధృవీకరణ ఇచ్చారని ఈ పత్రాలు స్పష్టం చేస్తున్నాయని ఆయన అన్నారు.
సాఫ్ట్బాల్లో మరో 38 మంది
సాఫ్ట్బాల్ పేరుతో మరో 38 మందికి ఇలాగే పరీక్ష లేకుండా టీచర్ పోస్టులు ఇచ్చారని జగన్ వివరించారు. ఈ సాఫ్ట్బాల్ అసోసియేషన్ అధ్యక్షుడు టీడీపీ ఎమ్మెల్యే కూన రవికుమార్ అని చెప్పారు.
అన్నకు ఫస్ట్, చెల్లెలికి సెకండ్
విశాఖకు చెందిన ఒక అభ్యర్థికి, ఆయన చెల్లెలికి స్పోర్ట్స్ కోటాలో ఎస్జీటీ పోస్టులు వచ్చాయి. 2009లో నల్గొండలో జరిగిన సౌత్ నేషనల్ ఖో-ఖో ఛాంపియన్షిప్లో అన్నకు ఫస్ట్, చెల్లెలికి సెకండ్ ప్లేస్ వచ్చినట్టు సర్టిఫికెట్లలో చూపించారు. కానీ విజేతల జాబితాలో వీరి పేర్లే లేవని తెలంగాణ ఖో-ఖో అసోసియేషన్ స్పష్టం చేసింది. ఆ రోజు అసలు గెలిచినవారి జాబితాను కూడా విడుదల చేసింది. ఈ రెండింటినీ జగన్ పక్కపక్కనే పెట్టి చూపించారు.
ఏ పోటీ ఎక్కడ జరిగిందో చూసి…
గుడివాడలో జరిగిన ఖో-ఖో పోటీల్లో పాల్గొన్నట్టు మరో అభ్యర్థి సర్టిఫికెట్ ఇచ్చారు. అది ఫేక్ అని ఖో-ఖో అసోసియేషనే శాప్కు అధికారికంగా చెప్పింది. అయినా ఉద్యోగం ఇచ్చారని జగన్ చూపించారు. 2003లో నాగార్జున యూనివర్శిటీలో ఆల్ ఇండియా ఇంటర్ యూనివర్శిటీ కబడ్డీ పోటీల్లో పాల్గొన్నట్టు మరో అభ్యర్థి సర్టిఫికెట్ పెట్టారు. కానీ అక్కడ జరిగింది సౌత్ వెస్ట్ జోన్ పోటీలు మాత్రమే అని తేలిందన్నారు. అంటే ఎక్కడెక్కడ పోటీలు జరిగాయో కనుక్కుని, దానికి తగ్గట్టు దొంగ సర్టిఫికెట్లు తయారుచేస్తున్నారని జగన్ అన్నారు.
టెట్ పాస్ కాకున్నా ఉద్యోగం
కొందరికి టెట్ పాస్ కాకుండానే ఉద్యోగాలు ఇచ్చారని జగన్ కేస్ స్టడీలతో చూపించారు. ఒక సబ్జెక్టులో టెట్ అర్హత ఉంటే, మరో సబ్జెక్టు పోస్టు ఇచ్చారని చెప్పారు. కర్నూలు జిల్లాలో ఒక అభ్యర్థికి ఎస్జీటీ పోస్టుకు టెట్లో 75 మార్కులు రావాలి. 65 మార్కులే వచ్చినా స్పోర్ట్స్ కోటాలో పోస్టు ఇచ్చారు. దీన్ని కర్నూలు డీఈవో కూడా ఒప్పుకున్నారని అన్నారు. 2018లో ఆ అభ్యర్థికి టెట్లో 77 మార్కులు వచ్చాయని కప్పిపుచ్చే ప్రయత్నం చేశారు. కానీ ఆ హాల్ టికెట్ నంబర్తో టెట్ వెబ్సైట్లో చెక్ చేస్తే, ఆ 77 మార్కులు స్కూల్ అసిస్టెంట్ స్పెషల్ ఎడ్యుకేషన్ కేటగిరీవి అని జగన్ చూపించారు. మరి ఆ మార్కులతో ఎస్జీటీ పోస్టు ఎలా ఇచ్చారు? అని ఆయన ప్రశ్నించారు.
ఈడబ్ల్యూఎస్ పేరుతో రాకెట్
ఈడబ్ల్యూఎస్ రిజర్వేషన్ పేరుతో పెద్ద రాకెట్ నడిచిందని జగన్ అన్నారు. కడప, కర్నూలు, తూర్పుగోదావరి జిల్లాల్లో ఇలాంటి కేసులు బయటకు వస్తున్నాయని చెప్పారు. కడపలో 2009, 2012, 2018లో బీసీ-ఈ కేటగిరీలో డీఎస్సీకి దరఖాస్తు చేసిన వ్యక్తికి, ఈసారి ఓసీ-ఈడబ్ల్యూఎస్ కింద పోస్టు ఇచ్చారని ఆ దరఖాస్తుల వివరాలతో చూపించారు.
జీవోలతో గేట్లు తెరిచి మూసేశారు
స్పోర్ట్స్ కోటాను 2 శాతం నుంచి 3 శాతానికి పెంచారు. జీవో 4, జీవో 47తో పరీక్షే లేకుండా నేరుగా నియామకాలకు గేట్లు ఎత్తారని జగన్ వివరించారు. పని అయిపోయాక జీవో 23, 25, 56తో మళ్లీ గేట్లు మూసేశారని చెప్పారు. ఎందుకు ఇచ్చారు? ఎందుకు ఉపసంహరించారు? అని ప్రశ్నించారు.
ఒకే వ్యక్తి చేతిలో ప్రశ్నపత్రం
డీఎస్సీ చరిత్రలో ఎప్పుడూ లేనట్టు ప్రశ్నపత్రాల తయారీ, పరీక్షల పర్యవేక్షణ రెండూ ఒకే వ్యక్తి చేతిలో ఎందుకు పెట్టారని జగన్ నిలదీశారు. ఎస్సీఈఆర్టీలో అవుట్సోర్సింగ్ ఉద్యోగిగా పనిచేసిన వ్యక్తికి ఫస్ట్ ర్యాంక్ ఎలా వచ్చింది? అతనికి ఉద్యోగం ఎందుకు ఇవ్వలేదు? మెరిట్ లిస్టులు ఎందుకు మార్చారు? అని ప్రశ్నించారు. ప్రశ్నపత్రాల్లో ప్రశ్నలనూ అమ్ముకున్నారని కొందరు అభ్యర్థులు చెబుతున్నారని, ఇది లీకేజీకి మరింత బలం ఇస్తోందని అన్నారు.
ఏడుసార్లు వెరిఫికేషన్ ఎక్కడ?
ప్రతి సర్టిఫికెట్ను ఏడుసార్లు వెరిఫై చేశామని అధికారులతో చెప్పిస్తున్నారని జగన్ అన్నారు. మరి ఇన్ని అక్రమాలు ఎలా జరిగాయి? అర్హత లేదని తెలిసీ పోస్టులు ఎలా ఇచ్చారు? ఎవరు చెబితే ఇచ్చారు? అని ప్రశ్నించారు.
అటవీ శాఖలోనూ అదే జీవో
అటవీ శాఖలో 814 ఉద్యోగాలకు నోటిఫికేషన్ ఇచ్చారు. అందులో 40 స్పోర్ట్స్ కోటా పోస్టులను పరీక్ష లేకుండా భర్తీ చేసేందుకు డీఎస్సీలో వాడిన జీవో-4నే వాడారని జగన్ చెప్పారు. డీఎస్సీ అక్రమాలు బయటపడగానే, ఈ 40 పోస్టుల జాబితా బయటకు వస్తుందనే భయంతో మిగిలిన 774 పోస్టుల భర్తీని కూడా ఆపేశారని అన్నారు.
సీబీఐ విచారణ కావాలి
ఆధారాలు బయటపెడితే కేసులు పెడతామని బెదిరిస్తున్నారని, జర్నలిస్టులపైనా కేసులు పెడుతున్నారని జగన్ అన్నారు. సోషల్ మీడియాలో ప్రశ్నించేవారి అకౌంట్లు బ్లాక్ చేస్తున్నారని చెప్పారు. ప్రభుత్వం కింద పనిచేసే అధికారులతో జరిగే విచారణ నిజాయితీగా ఉంటుందా? అని ప్రశ్నించారు. అందుకే సీబీఐ విచారణ జరపాలని, విద్యాశాఖ మంత్రి లోకేష్ రాజీనామా చేయాలని డిమాండ్ చేశారు. లక్షల మంది యువత ఏళ్ల తరబడి పోటీ పరీక్షలకు ప్రిపేర్ అవుతారు. లక్షల రూపాయలు ఖర్చు పెడతారు. చివరికి ఇలా జరిగితే వ్యవస్థలపై నమ్మకం ఎలా ఉంటుంది? అని జగన్ ప్రశ్నించారు.
