🌤 వాతావరణం
38°C
🥇 బంగారం
₹94,200
⛽ పెట్రోల్
₹108.76
విజయవాడ వర్షపాతం లోటు ఈసారి తీవ్రంగా కనిపిస్తోంది. 2026 నైరుతి రుతుపవనాల సీజన్లో నగరంలో సాధారణం కంటే 43 శాతానికి పైగా తక్కువ వర్షపాతం నమోదైంది. గత 20 ఏళ్లలో ఇదే అత్యంత పొడి మాన్సూన్గా నిలిచే పరిస్థితి కనిపిస్తోంది.
ఇటీవల విజయవాడలో భారీ వర్షం కురిసింది. కొద్దిసేపటికే నగరంలోని పలు రహదారులపై నీరు నిలిచిపోయింది. లోతట్టు ప్రాంతాల్లో వాహనదారులు, స్థానికులు ఇబ్బందులు ఎదుర్కొన్నారు. అయితే ఇలాంటి భారీ జల్లులు అక్కడక్కడా పడుతున్నా.. మొత్తం మాన్సూన్ వర్షపాతం లోటు మాత్రం అలాగే ఉంది. తక్కువ సమయంలో కురిసే భారీ వర్షం, సీజన్ మొత్తంలో రావాల్సిన వర్షాన్ని భర్తీ చేయలేకపోతోంది.
సెప్టెంబర్లోనూ ఆంధ్రప్రదేశ్లో సాధారణం కంటే తక్కువ వర్షాలు నమోదయ్యే అవకాశం ఉందని వాతావరణ శాఖ అంచనా వేసింది. అదే సమయంలో సాధారణం కంటే ఉష్ణోగ్రతలు ఎక్కువగా ఉండొచ్చని తెలిపింది. ఎల్నినో ప్రభావంతో వర్షపాతంలో లోటు కొనసాగుతున్నట్లు వాతావరణ నిపుణులు చెబుతున్నారు. విజయవాడలోనూ ఈ ప్రభావం స్పష్టంగా కనిపిస్తోంది. సెప్టెంబర్లోకి వచ్చినా ఉదయం నుంచే వేడి, ఉక్కపోత ఇబ్బంది పెడుతున్నాయి. బయట పనిచేసే వారు వర్షం కోసం ఎదురుచూస్తున్న పరిస్థితి కనిపిస్తోంది. వర్షం వచ్చినప్పుడు కొద్దిసేపు ఉపశమనం లభించినా.. ఆ తర్వాత మళ్లీ ఉక్కపోత పెరుగుతోంది.
వర్షపాతం లోటు ఎక్కువ కాలం కొనసాగితే దాని ప్రభావం కేవలం వాతావరణానికే పరిమితం కాదు. భూగర్భ జలాలు, చెరువులు, రిజర్వాయర్లలోకి వచ్చే నీరు, వ్యవసాయం వంటి వాటిపైనా ప్రభావం పడే అవకాశం ఉంది. ఇప్పటికే రాష్ట్రవ్యాప్తంగా వర్షాభావ పరిస్థితులు ఖరీఫ్ సాగుపై ప్రభావం చూపుతున్నాయి. ఆంధ్రప్రదేశ్లో జూన్ 1 నుంచి సెప్టెంబర్ 8 వరకు సాధారణంగా రావాల్సిన వర్షంతో పోలిస్తే గణనీయమైన లోటు నమోదైనట్లు తాజా నివేదికలు చెబుతున్నాయి. ఇటీవల వర్షాలు పడినా అవి అన్ని ప్రాంతాల్లో సమానంగా లేకపోవడంతో మొత్తం లోటు పెద్దగా తగ్గలేదు.
వర్షాలు తగ్గడంతో రాష్ట్రంలో పంటల సాగు విస్తీర్ణంపైనా ప్రభావం పడుతోంది. నీటి లభ్యతపై ఆందోళనల కారణంగా కొన్ని ప్రాంతాల్లో ఎక్కువ నీరు అవసరమయ్యే వరి సాగును తగ్గించి, తక్కువ నీటితో సాగయ్యే పంటల వైపు రైతులు మొగ్గు చూపుతున్నట్లు నివేదికలు వెల్లడిస్తున్నాయి.
విజయవాడలో వర్షాలు పూర్తిగా ఆగిపోలేదు. రాబోయే రోజుల్లో అక్కడక్కడా ఉరుములు, మెరుపులతో కూడిన జల్లులు పడే అవకాశం ఉంది. అయితే అవి విస్తృతంగా, నిరంతరంగా కురిస్తేనే ఇప్పటివరకు ఉన్న వర్షపాత లోటు కొంతమేర తగ్గే అవకాశం ఉంటుంది. అందుకే ఇప్పుడు విజయవాడ ప్రజల చూపంతా ఆకాశంపైనే. ఒక భారీ వర్షం నగర రోడ్లను ముంచెత్తగలుగుతోంది.. కానీ అదే సమయంలో మొత్తం మాన్సూన్ లోటును మాత్రం పూడ్చలేకపోతోంది. ఈ సీజన్ ముగిసేలోపు పరిస్థితి ఎంతవరకు మారుతుందనేది ఇప్పుడు ఆసక్తికరంగా మారింది.
